ཇོ་ནང་ཏཱ་ར་ནཱ་ཐས་མཛད།
ན་མོ་གུ་རུ། བར་དོའི་ངོ་སྤྲོད་མདོ་ཙམ་ནི། འདི་སྐད་ཅེས་བྱ་སྟེ། འཇིག་རྟེན་ཕ་རོལ་དུ་དུས་ལས་འདས་པ་ཆེ་གེ་མོ་ཞེས་བྱ་བ་ཉོན་ཅིག །སྤྱིར་སྐྱེས་པའི་ཐ་མ་ནི་འཆི། འདུས་པའི་ཐ་མ་ནི་འབྲལ། འདུས་བྱས་མི་རྟག་པའི་རང་བཞིན་ཡིན་ཞིང༌། ཁྱད་པར་དུ་འདི་ཞེས་བྱ་བ་ཁྱོད་ཀྱང༌། སྔོན་གྱི་ལས་ཟད་པའམ་འཕྲལ་གྱི་རྐྱེན་དྲག་པོ་ལ་བརྟེན་ནས་མདང་ཞག་ཚེའི་དུས་བྱས་ཏེ། མི་རྟག་པའི་མཚན་ཉིད་བསྟན། ད་ལྟ་སྲིད་པ་བར་དོ་ན་ཡོད་ཚོད་དུ་གདའ། དེ་ལ་གདམས་པ་ཟབ་མོའི་གནད་ནས་བཟུང་སྟེ། ཆོ་ག་དང་ངོ་སྤྲོད་མ་ཚར་གྱི་བར་དུ། རིག་པ་སེམས་ཀྱི་རང་སོ་བཟུང༌། མིང་བྱང་བྲིས་མ་དང་བཅས་པ་འདི་ལ་རྟེན་བཅས་ཏེ། ལྷན་ནེ་བག་ཕབ་ལ་ལེགས་པར་ཉན་འཚལ། དེ་ཡང་བར་དོ་ལ་བར་དོར་ཤེས་པ་གལ་ཆེ། བར་དོར་ངོ་ཤེས་ནས་ཀྱང་དགེ་བ་ལ་འདུན་པ་བསྒྱུར་བ་གལ་ཆེ། འདུན་པ་དེ་ཡང་གནས་ལུགས་ངང་{མུ་[དུ]་འབྱོར་བ་གལ་ཆེའོ། །
འདིར་བར་དོའི་གདམས་ངག་བསྟན་པ་ལ། བར་དོའི་མཚན་ཉིད། བར་དོའི་རྟགས། བར་དོའི་སྣང་བ། དེར་གདམས་ངག་ཇི་ལྟར་སྒོམ་པའི་ཚུལ། དེ་ལས་གནས་ལུགས་ངོ་འཕྲོད་ནས་གྲོལ་བའི་ཚུལ་ཏེ་ལྔའོ། །
དང་པོ་བར་དོའི་མཚན་ཉིད་ནི། ཆོས་མངོན་པ་མཛོད་ལས། སྔོན་དུས་སྲིད་འབྱུང་ཤ་ཚུགས་ཅན། །དེ་ནི་འཆི་བའི་སྔོན་རོལ་ཏེ། །སྐྱེ་བའི་སྐད་ཅིག་ཕན་ཆད་དོ། །རིགས་མཐུན་ལྷ་མིག་དག་པས་མཐོང༌། །ལས་ཀྱི་རྫུ་འཕྲུལ་ཤུགས་དང་ལྡན། །དབང་པོ་ཀུན་ཚང་ཐོགས་མེད་རྒྱུ། །མི་ལྡོག་དེ་ནི་དྲི་ཟའོ། །ཞེས་གསུངས་ཤིང༌། འདིར་སྔོན་ཞེས་བྱ་བ། སྔར་བྱུང་ཟིན་ལ་མི་ཟེར། རྒྱ་སྐད་དུ་པུརྦ་ཞེས་བྱ་བ་སྔོན་དང་ཤར་དང་མདུན་གསུམ་ལ་འཇུག་པ་ལས། འདིར་ལོ་ཙཱ་བས་སྔོན་ཞེས་པར་བསྒྱུར་ཡང༌། དོན་ལ་མདུན་ཡིན་པས་ད་ཕྱིན་ཆད་ཡོང་རྒྱུའི་དོན་ཡིན་ལ། དེ་ཡང་གནས་སྐབས་གཞན་དུ་བར་མ་ཆོད་པར་འཕྲལ་དུ་འབྱུང་རྒྱུ་ལ་ཟེར་བ་ཡིན་ནོ། །
དེ་ལ་ལུས་ཀྱི་རྣམ་པ་དབྱིབས་ཀྱི་ཁྱད་པར་ནི། གང་དུ་སྐྱེ་བ་ལེན་པར་འགྱུར་བའི་གཟུགས་དེ་འདྲ་བ་སྟེ། མིར་སྐྱེ་ན་བར་དོ་ཡང་མིའི་གཟུགས་དང༌། དུད་འགྲོར་སྐྱེ་ན་བར་དོ་ཡང་དུད་འགྲོའི་གཟུགས་སུ་འབྱུང་བ་སོགས་ཡིན་ཏེ། འོན་ཀྱང་སྐྱེ་བ་སྔ་མའི་བག་ཆགས་ཀྱིས་སྐྱེ་བ་སྔ་མ་གང་དུ་སྐྱེས་པ་དེའི་གཟུགས་སུ་ཡོད་སྙམ་པ་དང༌། དེ་དུས་ཀྱི་འགྲོ་བ་དེ་ཀ་ཡིན་པའི་རློམ་སེམས་བར་དོ་རང་ལ་འབྱུང་སྲིད་དེ་འཁྲུལ་བ་ཡིན། དུས་ཀྱི་ཁྱད་པར་ནི། འཆི་སྲིད་ཅེས་བྱ་བ་དྲན་མེད་བརྒྱལ་བ་ལྟ་བུ་ཞིག་ཡོད་པ་ལ། དེ་སངས་ནས་འགྲོ་བ་རིགས་དྲུག་ཏུ་སྐྱེ་བ་མ་བླངས་ཀྱི་བར་དེར་ཡིན། ལུས་ཀྱི་ཁྱད་པར་ནི། འབྱུང་ལུས་རགས་པ་མེད། ཤིན་ཏུ་ཕྲ་ཤིང་དྭངས་པའི་འབྱུང་བ་ལ་བརྟེན་པ་ཡིན་པས། འཛམ་བུ་གླིང་དུ་སྐྱེ་འགྱུར་གྱི་བར་དོ་གཅིག་གིས་འཛམ་བུ་གླིང་དུ་སྐྱེ་བར་འགྱུར་བའི་བར་དོ་གཞན་མཐོང༌། བ་ལང་སྤྱོད་དང་གླིང་གཞན་དུ་སྐྱེ་བར་འགྱུར་བའི་བར་དོ་མི་མཐོང༌། དེས་མཚོན་ནས་གཞན་ཐམས་ཅད་ལ་ཡང་འདྲ་སྟེ། གནས་དང་རིགས་མཐུན་པའི་བར་དོ་ནང་ཕན་ཚུན་གྱིས་མཐོང༌། གནས་རིགས་མི་མཐུན་པའི་བར་དོ་དང༌། འགྲོ་བ་རིགས་དྲུག་གི་སེམས་ཅན་མངོན་ཤེས་མ་ཐོབ་པ་རྣམས་ཀྱིས་མི་མཐོང༌། ལྷའི་མིག་གི་མངོན་ཤེས་སྐྱོན་བཅུ་གཅིག་དང་བྲལ་བས་མཐོང་ལ། དེ་ལས་གཞན་པའི་མངོན་ཤེས་ཡོད་ཀྱང་མི་མཐོང་ངོ༌། །
ཤུགས་ཀྱི་ཁྱད་པར་ནི། ལས་ཀྱི་རྫུ་འཕྲུལ་དང་ལྡན་ཞེས་བྱ་སྟེ། ཆོ་འཕྲུལ་སྣ་ཚོགས་པ་སྟོན་པའི་རྫུ་འཕྲུལ་མེད་ཀྱང༌། རྫུ་འཕྲུལ་ཡིད་མགྱོགས་དང་འདྲ་བར་གང་བསམ་པའི་གནས་དེར་སྐད་ཅིག་གིས་ཕྱིན་པར་ནུས་པའོ། །
དབང་པོའི་ཁྱད་པར་ནི། ལས་དང་མཐུན་པའི་གཟུགས་སྒྲ་དྲི་རོ་རེག་བྱ་མཐའ་དག་གསལ་བར་མཐོང་ནུས་པས། དབང་པོ་དྲུག་པོ་ཀུན་ཚང་བར་ནུས་པ་ཡིན་ལ། གང་དུ་སྐྱེ་བ་ལེན་པར་འགྱུར་བའི་ལུས་དེ་དབང་པོ་མ་ཚང་བ་འབྱུང་བ་ཞིག་ཡོད་ཀྱང༌། བར་དོ་ནི་དབང་པོ་དྲུག་རྟག་ཏུ་ཚང་བ་ཡིན་པས་ཤ་ཚུགས་ཙམ་དབྱིབས་འདྲ་བ་ཡིན་གྱི། དབང་པོ་ཚང་མ་ཚང་གི་སྒོ་ནས་མི་འདྲ་ལ། འོན་ཀྱང་ཤའི་སྲིན་བུ་སོགས་སུ་སྐྱེ་བ་ན། དེའི་བར་དོ་ལ་དེ་དང་གཟུགས་དབྱིབས་འདྲ་བའི་ཕྱིར། མིག་ཁྲ་འབུར་བ་དང༌། རྣ་བ་ཀྲོང་པོར་མེད་ཀྱི། གཟུགས་རྣམས་མཐོང་བ་དང༌། སྒྲ་རྣམས་ཐོས་པའི་དབང་པོ་འབྱུང་ལུས་ཡོད་པས་དེ་ཁོ་ན་མིག་དང་རྣ་བའི་དབང་པོ་ཡིན་ནོ། །རག་པའི་ཁྱད་པར་ནི། གང་དུ་སྐྱེ་བ་ལེན་པར་འགྱུར་བའི་སྐྱེ་གནས་མ་གཏོགས། རི་ར་བ་སོགས་ཐོགས་བཅས་ཀྱི་དངོས་པོ་གང་ལ་ཡང་ཐོགས་པ་མེད་པར་འཇུག་སྟེ་ཤིན་ཏུ་དྭངས་བའི་ལུས་ཡིན་པས་སོ། ། ཟས་ཀྱི་ཁྱད་པར་ནི། དྲི་ཟ་བ་སྟེ་དྲི་ཚོར་བས་ཚིམ་པ་དང༌། ཚེ་རྒྱས་པ་དང་འཚོ་བར་འགྱུར་བ་ཡིན་ནོ། །ཆོ་ག་ཇི་ལྟ་བས་བྱིན་གྱིས་བརླབས་ཤིང་བསྔོས་པའི་མཆོད་པ་རྣམས་ཀྱང་ཐོབ་པ་ནི། མདོ་ནས་མ་བཤད་ཀྱང་སྔགས་ཀྱི་ཆེ་བ་ཡིན་ནོ། །
རྟེན་མི་འགྱུར་བའི་ཁྱད་པར་ནི། མི་ལྡོག་པ་སྟེ། དེ་ཡང་སྤྱིར་བཏང་ལ། དམྱལ་བའི་བར་དོ་གྲུབ་ནས་དམྱལ་བར་སྐྱེ་སྟེ། དམྱལ་བའི་བར་དོའི་མིའི་བར་དོར་བསྒྱུར་བའམ་ལྡོག་ཏུ་མེད། ལྷའི་བར་དོ་གྲུབ་ན་ལྷ་ཁོ་ནར་སྐྱེ་སྟེ། དམྱལ་བ་ལ་སོགས་པར་བསྒྱུར་ལྡོག་མེད་པའི་དོན་ཡིན་ལ། ཡང་དམིགས་བསལ་ལ་ཅི་སྟེ་ན་ལྡོག་གོ་ཞེས་གསུངས་པས། སངས་རྒྱས་བྱང་ཆུབ་སེམས་དཔའ་རྣམས་ལ་མཆོད་པའི་ནུས་མཐུ་དང༌། ཐུགས་རྗེའི་བྱིན་རླབས་བསམ་གྱིས་མི་ཁྱབ་པས་སྔགས་དང་ཆོ་ག་ལ་སོགས་པའི་ནུས་མཐུ་དཔག་ཏུ་མེད་པར་དགེ་བས་ངན་སོང་གི་བར་དོ་གྲུབ་ཟིན་པ་ཡང༌། དགེ་བ་དེ་དག་གི་ཕན་ཡོན་ལས། ལྷའི་བར་དོར་འགྱུར་བ་སོགས་ནི་ཡོད་དོ། །
གཞན་ཡང་ཚེའི་ཁྱད་པར་ནི། དུས་མཐའི་སྐད་ཅིག་མ་གཅིག་ནས་ཞག་བདུན་གྱི་བར་རིང་ཐུང་མ་ངེས་པར་ཡོད་ཅིང༌། དེ་ལས་ལྷག་པ་མེད་པར་བཤད། ཞག་བདུན་ལོན་ནས་ཀྱང་སྐྱེ་བའི་ཚོགས་པ་མ་རྙེད་ན། བར་དོའི་ལུས་སྔ་མའི་ཚེ་ཟད་དེ་ཤི་ནས། ཡང་བར་དོའི་ལུས་ཕྱི་མ་ཞིག་འགྲུབ། ཚུལ་དེ་ལྟ་བུས་བདུན་ཕྲག་བདུན་གྱི་བར་དུ་སྐྱེ་སྲིད་ཀྱི་ཚོགས་པ་མ་རྙེད་པ་ཡང་སྲིད། དེ་ནས་ངེས་པར་རྙེད་པས་དེ་བས་ལྷག་པ་མེད་པར་གྲགས་ཏེ་ཤས་ཆེ་བའི་དབང་དུ་བྱས་པ་ཡིན་ནོ། །
གཉིས་པ་བར་དོའི་རྟགས་ནི། འགྲོ་བའི་ལམ་བཞི། ཡ་ང་བའི་གཡང་ས་གསུམ། ངེས་པའི་རྟགས་དྲུག །མ་ངེས་པའི་རྟགས་དྲུག །འཇིགས་པའི་སྒྲ་བཞི་ལ་སོགས་པ་ཡིན་ཏེ། གང་དུ་ཕྱིན་པའི་གནས་ཐམས་ཅད་དུ་འོད་དཀར་པོའི་ལམ་བྱུང་ན། ལྷ་དང་ལྷ་མིན་དུ་སྐྱེ། ནག་པོའི་ལམ་བྱུང་ན་དམྱལ་བར། དམར་པོའི་ལམ་བྱུང་ན་ཡི་དྭགས། སེར་པོའི་ལམ་གྱི་མི་དང༌། དུད་འགྲོ་ལ་སོགས་པར་འཇུག་པ་ཡིན་ནོ། །
དེ་བཞིན་དུ་འདོད་ཆགས་ཀྱི་ལས་ཤས་ཆེ་བས་གཡང་ས་ཆེན་པོ་དམར་ཟང་ངེ་བ་དང༌། གཏི་མུག་གི་ལས་ཤས་ཆེ་བས་གཡང་ས་སྐྱ་ཆད་དེ་བ་དང༌། ཞེ་སྡང་གི་ལས་ཤས་ཆེ་བས་གཡང་ས་ནག་ངམ་པ་མཐོང་སྟེ། ངན་སོང་གསུམ་དུ་ལྷུང་བར་འགྱུར་བའི་ལྟས་ཡིན། སྒྲ་བཞི་ནི་སྔར་གསོན་པོའི་དུས་སུ་འབྱུང་བ་བཞིའི་རླུང་མ་མཆིངས་ཤིང༌། རླུང་དང་རྣམ་རྟོག་ཐ་མལ་པར་ཤོར་བས་དེའི་བག་ཆགས་ཀྱི་མཐུ་ལས། བར་དོའི་སྐབས་འདིར་འབྱུང་བ་ཕྲ་མོའི་ས་ཁམས་ལོག་པས་རི་ཞིག་པ་ལྟ་བུའི་སྒྲ་དང༌། ཆུ་ལོག་པས་རྒྱ་མཚོ་འཁྲུགས་པ་ལྟ་བུའི་སྒྲ་དང༌། མེ་ལོག་པས་ནགས་ཚལ་མེས་བསྲེགས་པ་ལྟ་བུའི་སྒྲ་དང༌། རླུང་ལོག་པས་ཡུལ་ཐམས་ཅད་གཡོ་བ་དང་ལྷན་ཅིག་ཏུ་འབྲུག་སྒྲ་ལྟ་བུའི་སྒྲ་འབྱུང༌། སྒྲ་དེ་དག་ལ་བརྟེན་ནས་འཇིགས་པ་དང་སྡུག་བསྔལ་སྣ་ཚོགས་པ་སྐྱེ་བའོ། །
ངེས་པའི་རྟགས་རྣམས་ནི། སྔར་རྩིག་པ་སོགས་ལ་ཐོགས་པ་ལས་ད་གང་ལ་ཡང་ཐོགས་རྒྱུ་མེད། སྔར་གཏམ་སྨྲས་པ་མི་གཞན་གྱིས་ཐོས་པ་ལས་ད་ལྟ་མི་ཐོས། སྔར་ཉི་ཟླ་གཟའ་སྐར་མིག་གིས་མཐོང་བ་ལས་ད་ལྟ་མི་མཐོང༌། སྔར་རྐང་རྗེས་སོགས་འབྱུང་བ་ལས་ད་ལྟ་རྗེས་མི་འབྱུང༌། སྔར་ལུས་ལ་གྲིབ་མ་འབྱུང་བ་ལས་ད་ལྟ་མི་འབྱུང༌། སྔར་མངོན་ཤེས་མེད་པ་ལས་ད་ལྟ་མངོན་ཤེས་ཕྲ་མོ་ཁྲེའུ་རིགས་སུ་འཆར། དེ་ཡང་ཁྱེད་བར་དོ་ན་ཡོད་པའི་རྟགས་ཡིན། ཉི་ཟླ་མི་མཐོང་བར་སྣང་མིན་མུན་མིན་དུ་འཆར་བ་འདི་ནང་ན་ཁམས་དཀར་དམར་མེད་པས་ཡིན། གཞན་རྣམས་ཐོགས་བཅས་ཀྱི་ལུས་མེད་པའི་རྒྱུ་མཚན་གྱི་ཡིན་ནོ། །
མ་ངེས་པ་དྲུག་ནི། གནས་ལ་ངེས་པ་མེད། ཟས་ལ་ངེས་པ་མེད། གོས་ལ་ངེས་པ་མེད། གྲོགས་ལ་ངེས་པ་མེད། སྤྱོད་ལམ་ལ་ངེས་པ་མེད། སེམས་ཀྱི་འཆར་ཚུལ་ལ་ངེས་པ་མེད་དེ། འཕྲལ་ནས་འཕྲལ་དུ་འགྱུར་ཞིང་འགྲོ་བ་དང༌། བྱ་སྤུ་རླུང་གིས་བསྐྱོད་པ་ལྟར་ཆོད་ཆོད་པ་ཡོད་དོ། །
གཞན་ཡང་གཅན་གཟན་མ་རུངས་པས་བདས་པ་དང༌། ལས་ཀྱི་རྡེའུ་དཀར་ནག་འགྲེམས་པ་དང༌། ཁ་ཆར་བུ་ཡུག་ལ་སོགས་པས་བདས་ནས་སྐྱབས་འཚོལ་བ་དང༌། གཤིན་རྗེའི་སྐྱེས་བུས་འཁྲིད་པ་ལ་སོགས་པ་ཕལ་ཆེར་འཇིགས་སྐྲག་གི་སྣང་བ་ཤས་ཆེ་བའི་འཁྲུལ་སྣང་བརྗོད་ཀྱི་མི་ལང་བ་ཞིག་ཡོང་སྟེ། སྐྱེ་བ་སྔ་མ་ནི་ཤི་ཕྱི་མ་མ་ལོངས་པའི་ད་ལྟ་བར་དོ་ན་ཡོད་པར་འདུག །གདམས་པས་གནད་ནས་བཟུང་སྟེ། སྐབས་འདིར་གྲོལ་བ་ཞིག་བྱེད་དགོས་སྙམ་པས་དྲན་པ་རྒྱུན་ཆགས་སུ་སྟེན་ཅིག །
གསུམ་པ་བར་དོའི་སྣང་བ་ནི། ཁྱེད་ལ་ད་ལྟ་རྣམ་པ་མ་ངེས་པ་འཆར་བ་དེ་ཐམས་ཅད་རང་གི་སེམས་འཁྲུལ་བའི་སྣང་བ་ལས་བྱུང་བ་ཡིན་གྱི། ཕྱི་རོལ་ན་དོན་ལོགས་སུ་གྲུབ་པ་མེད་པས་གཟུགས་མཛེས་པ་དང་སྒྲ་སྙན་པ་དང་དྲི་ཞིམ་པ་དང་རོ་མངར་བ་དང་རེག་བྱ་བདེ་བར་སྣང་བ་ཐམས་ཅད་འཁྲུལ་བ་ཡིན་པས་མ་ཆགས་ཤིག །གཟུགས་མི་སྡུག་པ་དང་སྒྲ་མི་སྙན་པ་སོགས་ཀྱང་སེམས་ཀྱི་འཁྲུལ་སྣང་ཡིན་པས་ཡིད་ལ་མི་བདེ་བ་མི་བྱ། དེ་བཞིན་དུ་དགྲ་གཉེན་དུ་སྣང་བ་ཡང་འཁྲུལ་སྣང་ཡིན་པས་དགྲར་སྣང་བ་ལ་ཞེ་སྡང་མ་བྱེད། གཉེན་དུ་སྣང་བ་ལ་ཆགས་སེམས་མ་བྱེད། ཚ་གྲང་དུ་སྣང་བ་ཡང་འཁྲུལ་པ་ཁོ་ན་ཡིན་པས། ཚ་བའི་སྣང་བ་ཤར་ཀྱང་འཇིགས་སྐྲག་མ་བྱེད། གྲང་བ་ལ་ཆགས་པ་དང་འདུན་པ་བྱེད་མི་ཉན། གྲང་བའི་སྣང་བ་ཤར་ཀྱང་དེ་ལ་འཇིགས་སྐྲག་དང་སྡུག་བསྔལ་མ་བྱེད། དྲོ་བ་ལ་སྨོན་པ་དང་ཆགས་སུ་མི་རུང༌། རང་བུད་མེད་ཀྱི་སྣང་བར་ཤར་ཏེ་སྐྱེས་པ་ལ་ཆགས་པ་དང༌། བུད་མེད་ལ་སྡང་བའི་སེམས་མ་བྱེད། དེ་བཞིན་དུ་རང་སྐྱེས་པའི་སྣང་བར་ཤར་ན། བུད་མེད་ལ་ཆགས་པ་དང་སྐྱེས་པ་གཞན་ལ་སྡང་བའི་སེམས་མ་བྱེད། ཆགས་སྡང་གི་སེམས་བྱས་ན་མངལ་སྐྱེས་སུ་འཇུག །བར་དོའི་གནས་སྐབས་ཀྱི་སྐྱེས་པ་དང་བུད་མེད་དུ་སྣང་བ་ཡང་རང་གི་སེམས་སྣང་ཙམ་ཡིན་གྱི། དོན་ལ་གྲུབ་པ་མེད་པས་ཆགས་སྡང་བྱེད་པར་འཁྲུལ་ལོ། །
ས་ཕྱོགས་དང་ཡུལ་ཕྱོགས་དགའ་དགའ་ལྟར་སྣང་བ་མཐོང་བྱུང་ནའང་འཁྲུལ་པ་ཡིན་སྙམ་གྱིས་ལ་དགའ་བར་མ་བྱེད་ཅིག །དྲི་མ་མནམས་པས་ཞིམ་སྙམ་པ་ཚོར་ཡང་མེད་བཞིན་དུ་སྣང་བ་ཡིན་པས་ཆགས་པར་མ་བྱེད་ཅིག །གཤེད་མ་དང་གཅན་གཟན་ལ་སོགས་པ་སྲོག་ཆགས་འཇིགས་སུ་རུང་བ་མཐོང་ཡང༌། མེད་བཞིན་དུ་སྣང་བ་འཁྲུལ་པ་ཡིན་པར་ཤེས་པར་གྱིས་ལ་འཇིགས་སྐྲག་མ་བྱེད། དེ་ཐམས་ཅད་ལ་རང་གི་རིག་པ་སོ་ཟིན་པར་དྲན་པས་བཟུང་ཞིག །གཞན་ཡང་ཁྱེད་རང་ཆགས་སྡང་དང་སྡིག་པའི་སྣང་བ་བྱས་ན། སྔར་གྱི་ལས་ངན་པ་གསོས་ཐེབས་ཏེ་ངན་སོང་གསུམ་དུ་སྐྱེ་བར་ཐེ་ཚོམ་མེད། དད་པ་དང་སྙིང་རྗེ་ལ་སོགས་པ་དགེ་བའི་སེམས་བསྐྱེད་ན། སྔར་གྱི་དགེ་བ་རྣམས་གསོས་ཐེབས་ནས་རབ་ཏུ་ད་ལྟ་གྲོལ་བར་འགྱུར་ཞིང༌། ཐ་མ་ཡང་མཐོ་རིས་སུ་འགྲོ་བར་ཐེ་ཚོམ་མེད་དོ། །
དེས་ན་ཁྱེད་རང་རྫས་དང་ཡོ་བྱད་ཉེ་དུ་སོགས་གང་ལ་ཡང་མ་ཆགས་པ་སེར་སྣའི་བློ་མ་བྱེད། འདི་རྣམས་ལ་ཆགས་ཞེན་བྱས་ཀྱང་བྲལ་ཟིན་པ་ཡིན་པས། ད་འགྲོགས་པའི་སྐལ་བ་མེད། ཆགས་ན་འཁོར་བར་འཁྱམས་པ་ཡིན་པས་བློ་ཐག་ཆོད་ཅིག །གཞན་ཡང་ཁྱེད་ལ་ཤུལ་ན་ཡོད་པ་རྣམས་ཀྱིས་དཀོན་མཆོག་ལ་མཆོད་པ། སྐྱེ་བོ་ལ་སྦྱིན་གཏོང༌། སྐུ་གསུང་ཐུགས་ཀྱི་རྟེན་བཞེངས་པ། དགེ་འདུན་ལ་ཞབས་ཏོག །གཞན་ཡང་ཕྱག་འཚལ་བ། མཆོད་པ་འབུལ་བ། སྨོན་ལམ་འདེབས་པ། སྡིག་པ་བཤགས་པ། ཆོ་ག་བྱེད་པ་སོགས་འདི་ལྟར་བྱེད་པ་ཡིན་པས། དགེ་བའི་རྩ་བ་རླབས་པོ་ཆེ་འདིས་ཁྱེད་ལ་ཕན་འདོགས་ཆེན་པོར་འགྱུར་བས་སྡུག་བསྔལ་མི་འཚལ་ལོ། །
བཞི་པ་གདམས་ངག་ཇི་ལྟར་བསྒོམ་པ་ནི། དང་པོ་ཉིད་དུ་བར་དོ་དངོས་ཡིན་སྙམ་དུ་ཤེས་པས་གནས་སྐབས་འདིར་མ་འཁྲུལ་བ་ཞིག་བྱེད་དགོས། ཁྱད་པར་དུ་ཡང་སྐྱབས་གནས་དང་རེ་ས་གཞན་མེད་པས་རྩ་བའི་བླ་མ་དམ་པ་ཆེ་གེ་མོ་ཞེས་བྱ་བ་དེ། སངས་རྒྱས་ཀུན་འདུས་སུ་ཤེས་པར་གྱིས་ལ་མོས་གུས་དུང་དུང་བས་གསོལ་བ་ཐོབ་ཅིག །གཟུགས་སུ་སྣང་ཚད་བླ་མའི་སྐུ། སྒྲ་གྲག་ཚད་བླ་མའི་གསུང༌། དྲན་རིག་རྣམ་རྟོག་ཐམས་ཅད་བླ་མའི་ཐུགས་ཀྱི་བྱིན་བརླབས་ཡིན་སྙམ་པའི་སྒོ་ནས་མོས་གུས་དང་མ་བྲལ་བར་མཛོད། ཡང་དེ་བཞིན་དུ་གནས་སྐབས་འདི་བར་དོ་ཡིན་པས། དག་པའི་སྣང་བར་བསྒྱུར་དགོས་སྙམ་པ་གྱིས་ལ། ཁྱེད་རང་གི་ལུས་འཕགས་པ་སྤྱན་རས་གཟིགས་ལྟ་བུ་ཡི་དམ་གྱི་སྐུ་གསལ་དྭངས་རྙོག་པ་མེད་པ་འཇའ་ཚོན་ལྟ་བུ་དང༌། གཟུགས་སུ་སྣང་ཚད་ཡི་དམ་གྱི་སྐུ། སྒྲ་གྲག་ཚད་གསང་སྔགས་ཀྱི་སྒྲ། དྲན་རིག་རྣམ་རྟོག་ཐམས་ཅད་སྒྱུ་མ་རྨི་ལམ་ལྟར་ཤེས་པར་བྱའོ། །
གཞན་ཡང་ཁམས་གསུམ་འཁོར་བ་ཐམས་ཅད་སྡུག་བསྔལ་འབའ་ཞིག་ཡིན་པས། འཁོར་བའི་ལོངས་སྤྱོད་ཅིས་ཀྱང་དགོས་པ་མེད་སྙམ་པ་དང༌། འཁོར་བ་ནི་ལས་ལས་བྱུང༌། ལས་ནི་ཉོན་མོངས་ལས་བྱུང༌། ཉོན་མོངས་མ་ཟད་ན་འཁོར་བ་མི་ཟད། ཉོན་མོངས་སྤངས་ན་འཁོར་པ་ལས་རང་གྲོལ་བ་ཡིན། སྔར་ཡང་ཉོན་མོངས་འདིས་འཁོར་བར་འཁྱམས། ད་ཡང་འདིའི་དབང་དུ་སོང་ན་སྡུག་བསྔལ་ལ་ཟད་པ་མེད་སྙམ་པའི་སྐྱོ་ཤས་ངེས་འབྱུང་དང༌། སེམས་ཅན་ཐམས་ཅད་ལ་བྱམས་སྙིང་རྗེ་དུང་བ་དང༌། ལས་སྡིག་པ་ལས་སྡུག་བསྔལ་དང༌། དགེ་བ་ལས་བདེ་བ་འབྱུང་བ་ལ་ཡིད་ཆེས་དུང་བ་དང༌། གཞན་ཡང་བླ་མ་ཡི་དམ་སངས་རྒྱས་ཆོས་དང་དགེ་འདུན་ཏེ་དཀོན་མཆོག་རྣམས་ལ་བློས་ལིང་གིས་ཁོལ་ཞིག གཞན་ཡང་མངལ་སྒོ་འགེགས་པ་ཞེས་བྱ་བར་དགོས་པ་ཡིན་ཏེ། འགྲོ་བ་རིགས་དྲུག་ཕོ་མོ་ཐམས་ཅད་ལ་ཐ་མལ་གྱི་སྣང་བ་མི་བྱེད་པར་ཡི་དམ་ཡབ་ཡུམ་དུ་སྒོམ་པ་བསྐྱེད་རིམ་གྱི་མངལ་སྒོ་འགེགས་པ་ཡིན། ཕོ་མོ་དང་ཆགས་སྤྱོད་ཀྱི་སྣང་བ་གང་མཐོང་ཡང་གང་ཤར་དེ་ཉིད་སྒྱུ་མ་ལྟ་བུར་ཤེས་ནས་དབྱིངས་སུ་སྤྲོས་བྲལ་ལ་མཉམ་པར་འཇོག་པ་ནི། འོད་གསལ་གྱི་སྒོ་ནས་མངལ་སྒོ་འགེགས་པ་དང༌། མངལ་དུ་སྐྱེ་བ་ལེན་པ་དང༌། འདོད་ཆགས་ཀྱི་ཉེས་དམིགས་ཤེས། ཚངས་པར་སྤྱོད་པའི་ཕན་ཡོན་མཐོང་ནས། སེམས་འདོད་སྲེད་ཀྱི་དབང་དུ་མི་གཏོང་པ་ནི་ཚངས་སྤྱོད་ཀྱི་སྒོ་ནས་མངལ་སྒོ་འགེགས་པ་ཞེས་བྱ་སྟེ། གཞན་ཡང་ཚེ་འདས་ཀྱི་གང་ཟག་དེ་གསང་སྔགས་ནང་གི་ཉམས་མྱོང་ཅུང་ཟད་ཡོད་པ་ཡིན་ནོ། །བསྐྱེད་རིམ་གྱི་སྐབས་དབང་ལེན་པ་དང༌། འོད་གསལ་གྱི་སྐབས་རྣམ་ཀུན་མཆོག་ལྡན་གྱི་སྟོང་གཟུགས་ངོ་སྤྲོད་པ་དང༌། ཚུལ་ཁྲིམས་ཀྱི་སྐབས་ནང་འཛག་མེད་ཀྱི་ཚུལ་ཁྲིམས་སོགས་ཚུལ་ཁྲིམས་ལ་བརྟེན་ནས་ངོ་སྤྲད་པར་བྱའོ། །
ལྔ་པ་གནས་ལུགས་ངོ་འཕྲོད་ནས་གྲོལ་བའི་ཚུལ་ནི། སྔར་གསང་སྔགས་ནང་གི་ངོ་སྤྲོད་གསུམ་པོ་དེས་ངོ་འཕྲོད་ན་ལོགས་སུ་མི་དགོས་ཀྱང༌། དཀྱུས་ལྟར་ནའང་སྐད་ཅེས་བྱ་སྟེ། ཁྱེད་རང་ལ་དགྲའམ་གཉེན་དང་འཕྲད་པ་དེ་ན། བདེ་བའམ་སྡུག་བསྔལ་དུ་སྣང་བ་སྣ་ཚོགས་པ་ཞིག་སྣང་བ་དེ་ཐམས་ཅད་རང་གི་སེམས་ཀྱི་བག་ཆགས་འཁྲུལ་བའི་སྣང་བ་མ་གཏོགས་ཕྱི་རོལ་ན་དོན་ལོགས་སུ་གྲུབ་པ་མེད། སེམས་ལ་དགའ་སྡུག་མཐོ་དམན་ཆགས་སྡང་སྣ་ཚོགས་པ་ཤར་བ་དེ་ཡང་རིག་པ་ཕྱིར་བལྟས་སུ་ཤར་ཙ་ན། བདེ་སྡུག་གི་སྣང་བ་སྣ་ཚོགས་བསྐྱེད་པ་དངོས་གནས་ལ་གྲུབ་པ་འདྲ་བ་ཞིག་བྱུང་ཡང་རྨི་ལམ་གྱི་དགྲས་དེད་པ་དང༌། སྒྱུ་མའི་ཆུས་ཁྱེར་བ་ལྟར་འཁྲུལ་པ་ལ་འཁྲུལ་པ་བསྣན་པ་ཡིན་པས་སྣང་བའི་དུས་ཉིད་ནས་ཡོད་མ་མྱོང་པ་ཡིན། གང་ཤར་བ་དེའི་ངོ་བོ་ལ་བལྟས་པས་རང་བཞིན་མེད་པར་ཤེས་ཙ་ན། ཆགས་སྡང་ལ་སོགས་པའི་སེམས་དེ་ཡང་ངོས་གཟུང་མེད་པ། འཇའ་ཚོན་གྱི་རྗེས་བདས་པ་ལྟ་བུར་འདུག །དེ་ལ་བརྟེན་པའི་དགའ་མི་དགའ་བདེ་སྡུག་ཐམས་ཅད་ཀྱང་རང་བཞིན་ཤེས་ཙ་ན་སྣང་བའི་དུས་ཉིད་ནས་རང་གྲོལ་བ། བྱ་ལམ་རྗེས་མེད་དམ་ཆུ་ལ་རི་མོ་བྲིས་པ་ལྟར་ཤེས་པས་ཆགས་སྡང་རང་སར་གྲོལ་ནས། གནས་ལུགས་སྤྲོས་པ་ཐམས་ཅད་དང་བྲལ་བ་མངོན་དུ་འགྱུར་བ་ཡིན་ནོ། །གཞན་ཡང་ཁྱེད་ལ་ཁ་དོག་ལྔའི་འོད་ཟེར་སོགས་སྣ་ཚོགས་སྣང་བ་འདི་ལེགས་པར་བརྟགས་ན། རང་གི་སེམས་ཡེ་ཤེས་ལྔའི་རང་སྣང་ཡིན་པས་རྣམ་པ་ཀུན་གྱི་མཆོག་དང་ལྡན་པའི་སྟོང་གཟུགས་ཕྱག་རྒྱ་ཆེན་པོ་ཞེས་བྱའོ། །
སྒྲའི་བྱེ་བྲག་སྣ་ཚོགས་ཚོར་བ་འདི་ཡང་ཆོས་ཉིད་དོན་གྱི་རང་སྒྲ་གཞོམ་དུ་མེད་པའི་ནཱ་ད་བརྗོད་བྲལ་གྱི་དབྱངས་ཞེས་བྱ་བ་དེ་ཡིན། གཞན་ཡང་འཇིགས་སྐྲག་དགའ་སྡུག་སྣ་ཚོགས་ཤར་བའི་དུས་ཀྱི་ངོས་གཟུང་ཐམས་ཅད་དང་བྲལ་བའི་སེམས་གསལ་ལ་རིག་པ་མ་འགགས་པ་སྟེ། ཆོས་དབྱིངས་བརྗོད་བྲལ་སྟོང་ཉིད་ཐུགས་རྗེའི་ཡེ་ཤེས་ཡིན་ལ། ཆགས་ཐོགས་སྲེད་པའི་རང་བཞིན་དེ་ལ་རྣམ་པར་རྟོག་པའི་རབ་རིབ་སྤངས་ཏེ་བཞག་པ་ན། སེམས་ཀྱི་རེ་བ་དེ་སྣང་དུ་ཤར་བ་དེ་ནི་ལྷན་ཅིག་སྐྱེས་པ་འགྱུར་མེད་བདེ་བའི་རང་ཞལ་ཡིན་པས། དེ་རྣམས་ལ་རྩོལ་བཅས་ཀྱི་སྤྲོས་པ་སྤངས་ཏེ་མཉམ་པར་གཞོག་ཅིག །གནས་སྐབས་བཞིའི་བག་ཆགས་རང་སར་དག་ནས་རྡོ་རྗེའི་བཞི་མངོན་དུ་འགྱུར་བ་ཡིན་ནོ། །
དེ་ལྟར་དོན་དམ་དབྱིངས་ལ་མཉམ་པར་འཇོག་མི་ནུས་ན་ཡང་མོས་པས་བསྒོམས་ལ། འདི་བཅོམ་ལྡན་འདས་འདི་ཞེས་བྱ་བའི་དཀྱིལ་འཁོར་དུ་མངོན་གསུམ་དུ་འཇུག་པ་ཡིན་ལ། བདག་གིས་ཀྱང་ཆོ་གའི་བྱ་བ་རྒྱུད་སྡེ་བཞི་ནས་མངོན་པར་བསྒྲུབས་པ་ཡིན་པས། སེམས་ཅན་ཐམས་ཅད་ལ་སྙིང་རྗེ་བསྐྱེད། བླ་མ་དཀོན་མཆོག་ལ་མོས་གུས་བསྒོམས་ནས་ཆོ་ག་བྱས་པའི་དོན་རྣམས་མ་ནོར་བར་ཡིད་ལ་གྱིས་ཤིག །ཅེས་བརྡ་སྦྱར་ལ་རང་རང་གི་ཆོ་ག་ལ་འཇུག་གོ །དམིགས་ཡུལ་བསྒྲུབ་བྱ་དེ་གསོན་པའི་དུས་སུ་གསང་སྔགས་བླ་མེད་ཀྱི་དབང་སོགས་མ་ཐོབ་ན། འོད་ཟེར་ལྔ་ངོ་སྤྲོད་པ་མན་ཆད་རྡོ་རྗེ་བཞིའི་ངོ་སྤྲོད་རྣམས་མ་བྱས་ཀྱང་ཆོག་གོ །དེ་ལྟར་བཤད་པ་དེ་རྣམས་ཀྱི་ཚིག་དོན་གྱི་རྐང་རྣམས་བློ་ལ་ངེས་པར་བྱས་ནས་རྒྱས་པར་ཡོངས་སུ་རྫོགས་པ་འདི་བཤད་པར་བྱ་ལ། མདོར་བསྡུས་ཀྱི་ཚེ་ཅི་རིགས་པ་བླངས་ཏེ་བཤད་དོ། །
ཞེས་པ་འདི་ཡང་དོན་གཉེར་འགས་བསྐུལ་བའི་ངོར་ཏཱ་ར་ནཱ་ཐས་སྨྲས་པའོ། །ཞུས་དག མངྒ་ལཾ།
